bedehusweb.no

Måndag 28. september kl. 20.00 inviterer Øystese Indremisjon og Norheimsund & Øystese Ungdomskor til «Me syng i lag…» i Øystese bedehus. Fellessong, korsong, tekstlesing og solosong står på programmet. Det blir kollekt til Kirkens Nødhjelp sitt arbeid for flyktningane i Europa. Velkommen!

Fredag 2. oktober og lørdag 3. oktober kjem Lill May Vestly til Norheimsund. Fredag skal Lill May ha foredrag under årets «Kvammmaveko» om «Familien i samfunnsklemma», kl. 20.00 i amfisalen på Norheimsund barneskule (gratis inngang). Lørdag blir det foredrag om «Adam og Eva i samfunnsklemma», kl.11.00 i Norheimsund bedehus. Her blir det også tilbod om barnepass for alle aldersgrupper under foredraget. Barnepass startar frå kl 10.45. Etterpå, ca kl 12.30 inviterar me til felles grautmåltid for alle som vil. Det blir tatt opp ein kollekt etter foredraget. Eit eventuelt overskot går til nytt kjøkken i bedehuskjellaren. Foredraga til Lill May er unike, omtalte og etterspurte, og vekkjer, underheld og inspirerar! Begge foredraga er veldig aktuelle, om du er vant til å gå på bedehuset eller ikkje. Så dette er ein kjempefin anledning til å invitere med deg nokon du kjenner! Her kan du lese litt meir om Lill May Vestly og referansar frå hennar foredrag. Her kan du lese litt meir om Lill May Vestly og hennar virke. Velkommen!

Tysdag 25. august startar Krik 20+ Fotball opp att med trening kl. 20.00 i Norheimsund idrettshall. Det blir trening kvar tysdag kl. 20.00 – 22.00. Alle over 20 år er velkomne! Krik 13-19 har første samling onsdag 9. september kl. 20.00.

Sundag 23. august kl. 17.00 er det klart for haustens fyrste storsamling. Samlinga blir i Øystese bedehus. Temaet for samlinga er «Velkomen heim». Oddvar Ulltang og Anne Merete Vik underviser. Det blir barneopplegg, kollekt og kveldsmat.

Les meir om storsamling her.

Velkomen!

Måndag 24. august kl. 17.30 startar barnekoret Shine med øving igjen! Koret er for deg som er frå 5 år til og med 4. klasse. Øvingane er i Norheimsund bedehus kvar måndag kl. 17.30 – 18.15. Ta med ein ven og kom!

«Klapp i hendene, alle folk, lyft jubelrop til Gud! For Herren, Den høgste, er verd å frykta, ein stor konge over heile jorda. Han legg folkeslag under oss, folk legg han under våre føter. Han vel ut eit land for oss, ein stolt arv for Jakob, som han elskar.»/ «Clap your hands, all nations; Shout to God with cries of joy. How awesome is the Lord Most High; the great King over all the earth! He subdued nations under us, peoples under our feet. He chose our inheritance for us, the pride of Jacob, whom He loved.» Salme 47, 1-5.

Takk til alle som på ulikt vis har gjort tenester i laget, til alle som har teke del i fellesskap og oppgåver, til store og små som har bidrege til glede og samhald. Vel møtt til samvær, om det er litt mindre no i ferien, er det ny giv til hausten. Sjå websida og møteplanar. God sommar, ta med Bibelen i ferien! Norheimsund Indremisjon, leiar Vidar Grindheim

I samband med generalforsamlinga (GF) til Norsk Luthersk Misjonssamband i juli er Rael og Samson Lokipuna inviterte som gjester saman med fleire andre frå samarbeidande kyrkjer ikring i verda. Me her i Kvam er så heldige å få besøk av Lokipuna i forkant av GF. Tysdag 30. juni kl. 19.30 vert dei derfor å treffa på bedehuset i Norheimsund. Der vil dei både dela sitt vitnemål med oss og fortelja frå sitt liv og arbeid i Pokot, vest i Kenya gjennom både filmpresentasjon og tale.
Lokipuna, som no er biskop i det nord- vestre bispedømet i den lutherske kyrkja, har ein mangfaldig livsveg bak seg. Å få snakka med og stilla spørsmål til folk som tilhøyrer ein heilt annan kultur er både gjevande og interessant. Så dette må du få med deg! Velkomen!

Dette året har me sett opp to ettermiddagar til den årlege dugnaden med vasking, rydding og anna som me ynskjer å få gjort: torsdag 4. juni, og tysdag 9. juni kl. 17.30 – 20.30 med innlagt kaffipause. Me håpar at mange har høve til å vera med! Ta kontakt med Olav Helleve, epost; rag-he@online.no/ tlf. 91122640 og sei kva dag(ar) som passar. Vel møtt!

Måndag 1. juni vert det blåtur for Norheimsund og Øystese Ungdomskor. Det blir avreise frå Norheimsund bedehus kl. 18.00 og me er tilbake ca. kl. 21.30. Turen er heilt gratis, men ta med grillmat, drikke og varme klede. Dei som skal byrje i 8. klasse til hausten er spesielt velkomne til å bli med!

Norheimsund Indremisjon har gleda av å invitere til fest i Norheimsund bedehus 17. mai kl.18.30. Årets talar er Jostein Skutlaberg. Det vert også program for borna, musikk ved Øyvind Kleven, Kjersti Berg Leiren og Øyvind Nyborg, mat og kollekt. Alle er hjarteleg velkomne!