Søndag 20. desember kl. 11.00 blir det adventsamling i Norheimsund bedehus. På programmet står blant anna andakt frå foross.no og song av Isolde Holt Holene. Me syng advent- og julesongar saman, mellom anna frå julekantaten «Den store kongen». Vel møtt! Arr.: Norheimsund Misjonssamband.
Julekonsert i Norheimsund bedehus
Torsdag 10. desember kl. 20.00 arrangerer Norheimsund & Øystese Ungdomskor julekonsert i Norheimsund bedehus. Ungdomskoret med solistar og orkester framfører nye og gamle julesongar. Årets gjest er tidlegare dirigent Olav Skeie Lid. Billettane kostar kr. 150,- for vaksne og kr. 50,- for barn/student. Velkomen til ei fin førjulsstund i Norheimsund bedehus!
Julemessa
Takk til alle som deltok på julemessa lørdag 21. november! Totalt kom det inn kr. 174.000, fordelt på kr. 43.000 i loddsal før julemessa og kr. 131.000 på sjølve julemessedagen. Tusen takk til alle som har produsert varer, var med og selde varer eller hjepte til på andre måtar, eller var der og kjøpte varer. Pengane blir brukt i Mali, og elles der Misjonssambandet ser det er størst behov.
Møteveke med Marit Stokken avlyst
Møteveka i slutten av november er dessverre avlyst. Me håpar å få besøk av Marit hausten 2016.
Nytt kjøken i Norheimsund bedehus – dugnad våren 2016
Som kjent er det vedteke å fornya bedehuskjøkenet. For å få ned kostnaden ynskjer me mest mogeleg gjort på dugnad. Då treng me dugnadsfolk, og me håpar at du kan vera med å delta – på din måte. Oppstart vert onsdag 6. januar 2016. Me vil ha 2 faste dugnadskveldar i veka: Onsdag og torsdag kl. 17.30 – 20.30, med kaffipause kl. 19.00. Dei som har høve til det kan og arbeida på dagtid. Me legg til grunn at mange kan delta, slik at innsatsen kan fordelast og arbeidet gjennomførast snøgt. Du må sjølv bestemme kor mykje. Meld ifrå (jo før jo heller) til Olav Helleve, tlf. 911 22 640 eller: rag-he@online.no. Sei ifrå om nokon av dei faste dagane ikkje høver, og om du også kan arbeida på dagtid. Kan nokon stilla med kaffi / kaffimat kl. 19.00? Når me får deltakaroversikt fordeler me styrken på dugnadsdagane framover. Arbeidsoppgåvene vert naturleg nok varierte; riving, snikring, maling m.v. Vel møtt! Husstyret i NIM. Her kan du sjå teikningar av nytt kjøken.
Ungdomsmøte 30. oktober
Fredag 30. oktober kl. 20.00 er det klart for nytt ungdomsmøte i Norheimsund bedehus. Det vert song og musikk, konkurransar og andakt av Fredrik Gravdal. Etter møtet blir det kafe og aktivitetar i kjellaren. Alle er velkomne! Her kan du sjå aktivitetsplan for Origo hausten 2015.
Ung messe-storsamling 25. oktober
Sundag 25. oktober kl. 17.00 slår NIM/ ØIM og Den norske kyrkja saman storsamling og gudsteneste og lagar Ung messe-storsamling i Norheimsund kyrkje. Samlinga vert leia av sokneprest Lars Arne Vik og kateket Marna Roer. Det vert andakt ved Helge Kvamme frå NLM, song av ungdomskoret, kollekt og nattverd. Det blir også eige opplegg for borna. Samlinga vert avslutta med kveldsmat for alle. Velkomen!
Inspirasjonssamling
Onsdag 21. oktober kl. 19.00 blir styremedlemmer og leiarar i dei ulike laga som er tilknytta Norheimsund Indremisjon og Øystese Indremisjon invitert til inspirasjonssamling i Norheimsund bedehus. Me får besøk av Helge Nilsen. Han snakkar om «Grupper som lukkast!». Helge brukar si erfaring som talentutviklar i Sportsklubben Brann, inn i vår kristne samanheng. Det vert også tid til pause enkel servering og samtale om arbeidet.
«Når krisa rammar»
Tysdag 27. oktober kl. 19.30 i Norheimsund bedehus fortel Ragnhild og Tore Skeie frå jordskjelvkatastrofen i Nepal i vår, som dei opplevde på nært hald. Som HimalPartner sine utsendingar gjennom mange år har dei no avslutta sitt arbeid i landet. På møtet vert det kollekt til HimalPartner sitt arbeid i Nepal. Enkel servering. Velkomen!